KAWIH ÉCÉNG KAWIH KAPEURIH

KAWIH ÉCÉNG KAWIH KAPEURIH
Kahatur: Kang Dedy Windyagiri

Asmarandana

Kapireng hariring kingkin

Tembang ngawirahma lara

Sepi lumengis calombrék

Écéng ngarandap tunggara

Samakta kasangsara

Liwung bingung kapidangdung

Kapeurih nyasaak tresna

       Kumambang ngambang di cai

       Écéng marta samagaha

       Ramohpoy tina papastén

       Taya daya pangawasa

       Rasa ditilar tresna

       Lahuta laju di hirup

       Kumacacang eueuihan

Taraté anu bihari

Miakasih mikahéman

Mideudeuh ka kembang écéng

Kiwari sirna tapakna

Kabéngbat pangbibita

Pangrobéda kembang tunjung

Nu unggul sagala rupa

       Lain babad lain pacing

       Lain kananga kuduna

       Menggah kasebatna écéng

       Layanna génjér di sawah

       Moal tepung jeung rawa

       Nya tempat taraté hirup

       Kudu sadar kaayaan

(Sora écéng ngabangingik

Ngeundeug-ngeundeug alam raya

Buntala langit canéom

Samagaha ngaambara

Dunya kasaput méga

Méga tangara hanjelu

Nu peurih taya hinggana)